17 octobre 2008

stikka

                   Stikka

Ar ukan sul itlli ger tiswak .aynna yas fkan iwdan yamezt s tummert zund tazzant igh as sghan talullucht tamaynut mas iturar !!

Laz d ussemid d gar asmmaql d imal war tasna ,ghkad atga tudert n “”stika”” , yah awd assaghns ur irwas win miden , mach ur igi assagh li yas fkan zegh tallalit ,

Iwden ad iga (abed llah) isemk n wakuch , irzat uzemzad daw achenyal n tayri li yusi I tamurt ad tanammart !

Abed llah ,asafu n tigemmins n , iga gh ger aydars ,yan afroukh ger kust n tiferkhin , , yafud babas ifelt gh uswgasns wis ttam ,immagh d uzemz s ayna mu yufa , igh d iffagh zegh tinmel idu ar izenza iselman gh ugadaz,irar tin idd ,s dar yinnas ,ich imensins, yasid idlisn ns ihsu ayli yasn ifka aselmad .

Yaws I innas , ig argaz n tgemmi zegh timzins.

Tahelnt istmas yagurd ntan d yinnas (hniya) .

zrin iswgasn , ig abed llah argaz , ilkem s tighrins I aswir ifulkin ifkayas adur ger inwgans , ig abed allah aselmad I tutlayt n ta3rabt !!

Ghkeli s akw tinin : yan

ur

dars afulki gh tmazirt ns

ur

dars afulki awd gh ikhfens !!!

Mach kran tikkal ,ar itga afulki yad gar I afgan !

Abed allah s twalans , ar itiri tamazirt ns ,immagh ad ifalkay imalns , ar beda fellas itara ,ar sers itwirgi ar gis itumal , ar ikkat f izerfan n ufgan , ad iderf ad  inegh afessa fellas ikkan !

Ur

ju t issusm aqechab iberbchn li yas selsan , ira ad tg am tislit ,ad as iles aqcab amellal  ismerqin s usmerghi n itran ..iggut mad gis ira ur t yufi ,attan ar itimghur ar t itagwr , ur sul izdar ad yagwl izengign I ullns ,ur sul izdar ad ig semmus f imins ,ghkeli t akw gin iwdan n tamurtad tanemmart ..

Isawl abed llah ,isawl inna ayli yas itsutuln gh ugensns , isawl inna aylli

ur

zdarn at nnan wiyyad !!

Yull achenyal n tiderfiyt ,inna s tghuyyit : tangadayt negh tamerwayt !!!

Ur

izri akud igutn sigh ifra atig n tiderfiyt d izerfan lif ikkat ad illin .

gh uswgas  n 1984 ,gh yan idd ur irwass addan , nghan afgan gh ugens n abed llah , fkant tarragt I tillas n yan amadal iggut fellas assagh n aghzu !!

amadal ger kust n ighwrban  azn I gratesn attas , ahanu dwu akal ,

ur

t izri yan

ur

as isella yan !

mraw n uswgas ad gis ikka ,ar gis  itafud ifdi n tklit gh kri gat assef , ar gis itqqen laz s imik n ughrum iqqurn d imik n waman is ka rwasn aman !

ar gis ichta asemmid ikhsans ,yakwr gis amadun tadusins !

mraw n uswgas izrit ent gh tillas ,ur issen man ak ay tili uzal d man akud agh d itagwa idd , idda ad itu udem n wayur d usmerghi n itran , idda ad  itu is iga afgan , is ilul imghi ger inas d babas d istmas , is ighwra ayligh iga aselmad , is tlul gh ullns tayri n tawtemt ,iwwarg ad teg tasmunt n tudert ns , idda ad itu ,ghkelli st tun mind !!

itahl abed llah s tassast , binas illes lis isawl yan wass f tiderfiyt , d ufus lis itara gh yan uzemz f tayri n tamurt , tlkem tassast afans , ig afud timilla gh addad an !!

ilkem akud  ligh rad izwu akuc timilla gh ullawn n uccan , rzemn tifelwin n umadal an illasn , din abed llah , ad ilul  I tisnat twal gh tudert ad ,iffagh igellin ,yufad ifkhens gh yat (sahra2) war abrid ,sigh isyafa kran afus iters igin ighir ns , igrawl yafed yan argaz meqqurn ,

yinyas : man tamazirt agh tuchkidt ad k sers raregh a ywi ?

ismaql gis isiwnas allen , ira adas irar f useqsins ,mach illes ns ifelt darat n ughwrabad !!

ikwna ira ad as yara gh umlal ,mach afus awd ntat ifelt jaj n aghzu yad !!

yukz afeqqir an is ira ad as inna kra mach ur as yufi , ar as itini timizar ,yat s yat , ar as ikkat abed llah s ikhfens uhuy uhuy uhuy …aylligh inna assagh n tamdint ns , inder zund ighas iqqes kra ,yutas s uqllal ,yah yah yah …

imun dis afqir an iselkemt ar tamdint ar

tamdint n iselm d ideqqi , mac ur sul tgi ghkeli s t ifel ,  igigl ill ns , khwlan ighwrban iqburn , iwdan jlan kri gat yan d man adu at yiwin , isduqr gh imi n tgemi ligh ilul , iter ad isella I awal n yinnas mach ur as irzem awd yan , intu tagurt , yut adu n itay , ikchemd isella I taghlaghalt n yinnas d tadsa n istmas , yurrid sers uzemz s ussfan n timzins , isiwn allnes I yighwrban ar gisent itannay tiwllafin n igdam , izra tisit tugl ukan sul gh ger ahanuns d unwal ,ira ad gis yagw mach iksud ad izer kran udm yadnin ur igi wins , isdu f aghwrab ar yalla am azzan igh as kkesn akwfay , awd yan issen maf yalla abed llah , izd ,iswgasn liyas ukern ,negh innas li yafudn s tugt n izengign d wattan f iwis n tassans , amsyafa yad yuger ametta igut f usmammi !!

zegh akudan, ilesa abed llah aqchab n unufl , isenfel assaghns s (stikka) , isti ad beda yagug f tillawt ad inegh timektitns s iyiren li issa …

afgan war imal , war tasna .

ur ju ssengh is “”stika”” ikatin iga ameghnas , mach iga anw li ur issen afessa ,ur tmerks taghensans d tkhendallast , ur agh isawal ar ihedda darat n tmesmunin, ur agh izenza ar issagh gh tamurt ns !

stikka iga sul ameghnas , achku yugi ad dagh didengh idru amadal ad , isti ad yagug iski amadal izli sers !!

Posté par tanirt à 20:57 - Commentaires [0] - Permalien [#]


Commentaires sur stikka

Nouveau commentaire